Crebacabezas de 2025 pezas.

Nadal, para que todo encaixe.

Neste Nadal de 2025 decidimos elaborar de xeito artesanal un crebacabezas xigante, con tantas pezas como anos se cumpren do nacemento do neno Xesús. O xogo de encaixe érguese dentro dunha caixa que, ao tempo, garda as fichas aínda por colocar. No seu interior atopamos tamén as figuras do Nadal: os pais do neno, María e Xosé, os Reis Magos e mesmo o berce.

Todos estes elementos combinados, como se dun mosaico se tratase, proxectan unha estampa fonda e orixinal do que simboliza o Nadal.

Claves de interpretación:

• As pezas do crebacabezas somos cada un de nós.
• As pezas dispersas representan a diversidade que, á vez, forma parte dun todo.
• Os fragmentos ensamblados falan de unión, ben podería tratarse da nosa comunidade parroquial. Latexa aquel dito da carta de Pedro (Pedro 2, 4–5):  “tamén vós, como pedras vivas, entrades na construción dun edificio espiritual”. Cada peza únese ás máis próximas con lazos moi fortes, pero para que o conxunto estea completo facemos falta todas e todos.
• Ben sabemos que para completar un crebacabezas é precisa moita paciencia: darlle voltas a cada peza, probando distintos encaixes ata atopar o axeitado.
• Existe certo parecido entre algunhas pezas, mais non hai dúas iguais, por iso, cada unha debe atopar o seu lugar e o seu acougo.
• As cores ocres simbolizan a terra, a sobriedade e a antigüidade.
• Os tons palla falan de humildade e sinxeleza.
• Os retallos do crebacabezas parecen caer do ceo, como se Deus mesmo estivese a construír unha historia, dándolle sentido á vida do home e desvelando un segredo de amor,  que culmina co nacemento do seu Fillo e coa salvación que El nos trouxo. (Mateo 21, 42) «Nunca lestes nas Escrituras: A pedra que rexeitaron os construtores é agora a pedra angular». Daquela entendemos co berce do Neno sexa un elemento similar aos outros, porque El -pedra angular- é un de nós.
• Non sobra ningunha peza, precisámolas todas.

Outras consideracións:

• O puzzle é un xogo que precisa manter a atención e lembrar formas, cores e posicións. Un proceder semellante achegaranos á experiencia de Deus: lembrar vivencias, situacións, bos exemplos, intuicións, repasar a propia historia...
• Un recurso lúdico moi completo que favorece aprendizaxes cognitivas, emocionais e sociais dun xeito motivador. Calquera que se plante ante este gran Belén sentirase interpelado e daralle voltas ás pezas e á cabeza.

Pouco a pouco imos avanzando no traballo e descubrindo, con emoción, o resultado final. No crebacabezas da vida todo encaixa se atopamos a peza clave: o noso Señor, nado en Belén.

Que completedes o puzzle e sintades unha satisfacción permanente.

Lembra: Ti es unha peza deste puzzle!

Bo Nadal, parroquia!

TEMPO DE MISIÓN, TEMPO DE CATEQUESE.

O lema lembra que o tempo que vive a Igrexa neste momento é un tempo para a misión, unha “nova etapa evanxelizadora”, para a cal se precisa unha “Igrexa en saída”.

A misión ten como corazón e centro a proclamación da Boa nova, o Evanxeo, de que en Cristo se atopa a salvación. A Catequese e os sacramentos de iniciación cristiá teñen como obxectivo iniciar á vida propia que nace da fe e introducir aos crentes na vida da Igrexa e das comunidades cristiás.

Esta tarefa conleva a implicación da comunidade cristiá: familias, catequistas, cregos, etc. Só unha parroquia viva será quen de transmitir a fe a aqueles que se acheguen a nos.

ELEMENTOS DO CARTEL:

Esfera do reloxo. Indica o tempo e o seu transcorrer, cada momento da historia convértese tamén nun tempo oportuno de graza de Deus. Deus camiña con nós, e as mulleres e homes de cada tempo, teñen a posibilidade de atoparse con el e coa salvación que ofrece.

O templo parroquial e, no seu centro, o cáliz e a hostia. O domingo é, no tempo da vida de cada cristián, o día do Señor, o día santo por excelencia, porque é o día no que Cristo resucitou. Este é o motivo pola cal a Igrexa é congregada para celebrar o memorial da Pascua de Cristo, que é a Eucaristía, e, unida á Eucaristía, o domingo convértese así mesmo no día máis idóneo para a celebración dos procesos e os sacramentos de iniciación cristiá, así como para a realización da catequese de iniciación ao coñecemento da fe e á vida cristiá.

Siluetas de persoas de distintas idades na contorna do templo parroquial. Indican que a catequese de iniciación está orientada non só aos nenos e adolescentes senón tamén e, sobre todo, ás persoas adultas, que en moitos casos poderían ser os mesmos pais e nais, do mesmo xeito que os familiares dos nenos e nenas que participan nas nosas catequeses.

 ÁNIMO NESTE TEMPO DE MISIÓN E DE CATEQUESE!